Novas

Novas

Filtro
Info
1 Novembro 2016

Xornada de Patrimonio e incendios forestais

Como estaba previsto, celebramos unha completa xornada que tivo como protagonista ó Patrimonio arqueolóxico e os efectos sobre o mesmo producidos polos lumes deste verán pasado. Pola mañá, medio cento de camiñantes acompañaron as explicacións de arqueólogos e biólogos sobre o terreo das devastadoras consecuencias dos incendios e da súa incidencia no noso legado patrimonial. O trazado escolleito para a andaina foi o chamado Coto Molín, nas parroquias de Moreiras e Brués, onde puidemos ver in situ as desfeitas das lapas sobre mámoas, restos de minería romana, fauna e vexetación.

Pola tarde unha moi interesante conferencia na Casa da Cultura do Carballiño co suxestivo título de Incendios forestais: a marea negra dos montes galegos, impartida polo Dr. Serafín González Priet ben acompañada dunha abondosa relación de datos e imaxes, convidaba a unha seria reflexión sobre as consecuencias do lume sobre o medio natural e sobre as persoas.

Info
25 Outubro 2016

Andaina e conferencia para o sábado, 29 de outubro

ANDAINA

O Centro de Estudos Chamoso Lamas e o Grupo Ecoloxista Outeiro, organizan para o vindeiro sábado día 29 de outubro unha ruta guiada pola zona arqueolóxica do Monte Molín, situada entre as parroquias de Brués e Moreiras, no Concello de Boborás. Ao longo de 5 km arqueólogos e naturalistas explicarán os efectos do lume sobre o solo, a vexetación e os propios xacementos arqueolóxicos. O roteiro comezará ás 10 da mañá e terá como punto de encontro a igrexa parroquial de Brués.

CONFERENCIA

Seguindo coas actividades de divulgación, o mesmo sábado ás 19 hora, na casa da Cultura do Concello do Carballiño, terá lugar a conferencia titulada “Incendios forestais: a marea negra dos montes galegos”, a cargo de D.Serafín González Prieto, Presidente da Sociedade Galega de Historia Natural e investigador do CSIC.

Descargar arquivo
Info
14 Outubro 2016

A Deputación de Ourense editará o libro Cemiterios esquecidos: o fenómeno tumular na Comarca do Arenteiro

Na resolución correspondente ao exercicio 2016, formulada polo Consello Asesor de Publicacións do ente provincial, na sesión que tivo lugar o día 28 de xuño de 2016, acordaba a publicación da obra Cemiterios esquecidos; o fenómeno tumular na Comarca do Arenteiro da que é autor o membro da sección de Arqueoloxía do C. E. Chamoso Lamas, Jorge Lamas Bértolo. Trátase dun amplo e intensivo traballo de campo no que se recolle o numeroso elenco de elementos tumulares que a nosa comarca atesoura e que, ata agora, resultaban practicamente descoñecidos para especialistas e público en xeral.

Info
11 Outubro 2016

O Centro de Estudios Chamoso Lamas, colabora nas Xornadas Monográficas de Arquitecto´s

O C. E. Chamoso Lamas  estará presente nos actos que terán lugar dentro das Xornadas Monográficas de Arquitecto´s (XMA´s) que este ano se centrarán na figura de D. Daniel Vázquez Gulías M. (Beariz, 1869 - A Coruña, 1937) e que se levarán a cabo este venres, día 14, e o sábado, día 15, na Casa da Cultura do Carballiño. Este acto conta coa presenza de numerosos e recoñecidos especialistas do mundo da arquitectura e a arte que farán un percorrido pola vida e a obra deste importante arquitecto bearicense que deixou numerosas mostras da súa impronta espalladas pola nosa xeografía. A asistencia é libre e, consideramos, dun interese especial tanto pola figura á que se lembra como pola súa traxectoria porfesional. Debaixo podedes descargar o programa PDF deste evento.

Descargar arquivo
Info
8 Setembro 2016

Actividades mes de setembro

Neste mes de setembro, en horarios que se comunicacarán oportunamente, o Centro de Estudios Chamoso Lamas, vai celebrar dous novos actos dentro da programación que para este ano ten acordado. O primeiro destes eventos vai ser a visita ó Pazo de Banga e unha posterior camiñada cara a Cabanelas dende o mesmo para, unha vez alí, celebrar unha xornada de debate sobre a escritora Emilia Pardo Bazán dentro da nosa sede da Casa da Vexanca, acto no que intervirán Mª Carmen Docampo Nóvoa, Mª Teresa Álvarez Vilar e Carlos Rodríguez Calvo. Neste mesmo acto está prevista a entrega dos diplomas do Congreso do Home e o Medio.

Para finais deste mesmo mes ou comezos do próximo de outubro, un ano máis, está prevista unha nova andaina guidada ata o xacemento arqueolóxico de Castro Cavadoso, con saída dende Moldes. Destas novas xa vos teremos debidamente informados.

Info
8 Setembro 2016

Visita de profesores de Allariz a Pazos de Arenteiro

Membros do Centro de ESTUDOS CHAMOSO LAMAS, realizamos onte, día 7 de setembro, unha visita guiada a PAZOS DE ARENTEIRO acompañando a un grupo de profesores do IES ALLARIZ. Durante máis dunha hora, cun sol máis propio de xullo e cunha temperatura abafante, percorremos as rúas explicando as orixes de Pazos e a súa monumentalidade, visitando o casco histórico desta antiga vila e amosando a súa diversidade manifestada nas distintas construcións de tipo civil, popular e relixioso que conforman a súa gran riqueza monumental. Rematada a visita, seguiron viaxe a terras de Beade para visitar Ridimoas. 

Info
2 Agosto 2016

Andaina nocturna ós petroglifos de Cangues

O sábado, día 6, ás 22 horas, faremos unha segunda edición da andaina nocturna dende o Campo da Festa de Madarnás ata ós petroglifos de Cangues. Despois do éxito da realizada o ano pasado, repetimos roteiro. Ás 21,30 os interesados deberán estar no local veciñal de Madarnás para saír cara o punto de destino.

Consellos:

Levar linterna e algo refrectante

Non fumar

Levar algunha prenda de abrigo

Podedes consultar o PDF nesta nova.

Descargar arquivo
Info
17 Xullo 2016

O Centro de Estudios Chamoso Lamas, Premio Ínsua dos Poetas

O xurado do Premio Ínsua dos Poetas instítuído pola fundación que leva o mesmo nome e que preside o escritor Luis González Tosar, concedeu nesta VIII edición o seu premio no apartado de Patrimonio ó Centro de Estudios Chamoso Lamas. No acordo do xurado valórase dita concesión "a todos os seus  seus integrantes e colaboradores polo esforzó que veñen mantendo no eido do estudo e da investigación do patrimonio histórico e na divulgación da riqueza artística e natural das comarcas do Carballiño e do Ribeiro". O premio foi entregado ó Presidente do C.E. Chamoso Lamas polo Alcalde do Carballiño,  Francisco Fumega, que fixo unha valoración do traballo desenvolvido polo noso colectivo ó longo destes últimos 20 anos e das achegas que ten aportado nas súas investigacións ás Comarcas do Carballiño e do Ribeiro.

A entrega dos galardóns, celebrouse o sábado, 16 de xullo, na Festa da Palabra celebrada na Ínsua, en Madarnás. O acto contou coa asistencia de numerosas autoridades e unha variada e importante representaciónn do mundo da cultura galega no que se falou do importante papel que xoga e debe xogar o mundo cultural no desenvolvemento económico e social do país e, ó tempo, reivindicouse dun xeito craro a defensa da nosa lingua, da nosa cultura, da nosa identidade así como da importancia da palabra e do diálogo no entendemento da humanidade.

O noso agradecemento ó xurado polo que supón para nós a concesión deste galardón e á Fundación Ínsua dos Poetas para seguir avantando no progreso e defensa da nosa cultura.

Info
29 Xuño 2016

Actos do C. E. Chamoso Lamas en días pasados

O Centro de Estudios Chamoso Lamas tivo unha importante participación en diversas actividades desenvolvidas en datas pasadas na Comarca do Carballño. O día 3 de xuño unha conferencia co título "Pulpeiros en Arcos: mito ou realidade?" dentro dos actos da Festa das Parroquias era impartida por X. Luis Sobrado. O día 11, o noso compañeiro Xosé Fernández, recibía no Pazo de Moldes o Premio Losada Diéguez no apartado de investigación, acto no que actuou de mantedor o presidente do C.E. Chamoso Lamas e que contou coa presenza de numerososas persoas vinculadas co mundo da nosa cultura e da escea política do noso país. Na súa intervención, Xosé Fernández fixo unha emotiva, curta pero apaixoada exposición sobre a vida e a figura de Vicente Risco. Parabéns para o noso compañeiro.

Finalmente, o día 18 de xuño, a sección de arquitectura do C. E. Chamoso Lamas en colaboración co Centro Cultural Daniel Vázquez Gulías, participou activamente na programación e desenvolvemento da xornada de homenaxe celebrada en Maside e no Carballiño, na que se realizaron diversos actos relacionados coa obra do prestixioso arquitecto e na que participaron importantes personalidades do mundo da arte e da arquitectura de Galicia, estando presentes, ademais, membros da familia do arquitecto bearicense obxecto desta xornada.

Podedes ver as imaxes destes actos na Galería.

Info
4 Maio 2016

PROGRAMA DEFINITIVO X CONGRESO

Pódese descargar o Programa definitivo do X Congreso do Home e o medio premendo no enlace adxunto.

SERVIZO DE BUSES DENDE O CARBALLIÑO A CABANELAS IDA E VOLTA. Saída do Carballiño -fronte á Veracruz- media hora antes das sesións.

Descargar arquivo

Páxinas