Novas
Novas
Filtro
XI Congreso do Centro de Estudios Chamoso Lamas
Os días 28, 29 e 30 de setembro, o C. E. Chamoso Lamas vai celebrar o seu XI Congreso co suxestivo título de "Mesturas ás beiras do Miño. O fluxo cultural entre Galicia e Portugal". Unha vez máis, o lugar elixido para a súa execución vai ser a nosa sede da Casa da Vexanca, en Belvís-Cabanelas e, como novidade, a segunda xornada celebrarase en terras portuguesas. En días vindeiros teredes información completa do Programa de actividades e doutros pormenores, tales como prazo de matrícula, prezos, etc.
Se estades interesados en presentar algunha comunicación ó Congreso podedes facelo durante a semana do 20 ó 26 de agosto por medio do mail de contacto do C. E. Chamoso Lamas ou ós teléfonos 629879491 e 610782630.
O Premio "Pedra do destino", para o Centro de Estudios Chamoso Lamas
O galardón que os Amigos dos Museos de Galicia entrega anualmente ós colectivos que impulsan a conservación do patrimonio cultural galego, recaeu neste ano 2018 no Centro de Estudios Chamoso Lamas. Con esta distinción, a entidade convocante quere recoñecer "a súa constancia no estudo, divulgación e potenciación dos recursos culturais e patrimoniais das Terras do Carballiño, como os muiños e fábricas de papel das ribeiras do Arenteiro, a recuperación e posta en valor dos vellos camiños de feirantes, arrieiros e carboeiros, as vinculacións con Oseira, Beade, os gremios de pulpeiras, panadeiras…etc.".
O Premio que neste ano está dotado en 1.500 euros para aplicar a un proxecto do colectivo, ademais de material de interese histórico e cultural en relación coa zona, cos que se pretende enriquecer os fins museísticos deste colectivo. O galardón entregarase no Carballiño polos Magostos.
O fallo do premio deuse a coñecer o Día dos Museos, nun acto que a asociación celebrou na súa sede de Portas Ártabras na cidade da Coruña.
En nome do C.E. Chamoso Lamas, o noso infinito agradecemento e a nosa satisfacción por este recoñecemento a nivel galego que fai a Asociación de Amigos dos Museos de Galicia, vendo como colectivo que os nosos esforzos despois de case 25 anos teñen eco e dannos folgos para seguir coa traxectoria de traballo e ilusión coa que iniciamos a nosa andaina. Moitas grazas.
Miguel A. García recolle o seu galardón en Madrid.
Hoxe, día 23 de marzo, cadrando co Día Mundial do Medio Ambiente, o noso compañeiro Miguel A. García Pérez, responsable da estación meteorolóxica do IES Chamoso Lamas e da sección de Climatoloxía do Centro de Estudios, recolleu na sede central da Axencia Estatal de Meteoroloxía (AEMET) en Madrid o galardón co que foi recoñecido o seu traballo ó longo de máis de 34 anos á fronte da citada estación.
O acto contou coa presenza da Secretaria de Estado de Medio Ambiente, María García Rodríguez e do Presidente da Axencia Estatal de Meteoroloxía, Miguel Ángel López, recoñecendo os dous o labor "desinteresada y comprometida" do noso compañeiro. A secretaria de Estado agradeceu o seu traballo "y el de muchos otros, que destaca por su calidad y precisión, ha sido y es esencial para completar la observación de las instalaciones operadas por personal propio".
O remate do acto serviu, tamén, para presentar un diccionario ilustrado de meteoroloxía, climatoloxía e ciencias afíns con case 700 termos e máis de 1.200 imaxes, que pódese consultar en https://meteoglosario.aemet.es/.
Descargar arquivo
Presentación do Panel Climático do Carballiño
O Salón de Plenos do Concello do Carballiño serviu de escenario para a presentación do Panel Climático do Carballiño, un traballo de 34 anos de investigación diaria do noso compañeiro Miguel A. García e condensados nun só panel no que tamén colaborou o noso compañeiro Diego Reboredo Prado. A amplísima información que aporta non logra desvelar ningunha novidade salientable sobre o noso clima, en palabras do propio investigador, que engadía que cómpren moitos máis anos para poder aportar conclusións máis exactas sobre o proceso evolutivo do clima. O acto contou coa presenza do Alcalde, Francisco Fumega, que fixo a presentación á prensa no nome do Concello e do Presidente do C. E. Chamoso Lamas.
O panel conta con información de temperaturas medias, máximas e mínimas; datos anuais de precipitacións; información sobre as xeadas e as condicións da seca ambiental que se producen entre os meses de abril e setembro. A esta información hai que engadir unha táboa que recolle os parámetros climáticos xerais do Carballiño e outra máis que amosa as curiosidades más extremas. Para rematar, o autor falou de que aínda faltan por incorporar dúas variantes moi importantes, como son a humidade e a irradiación solar. Tampouco se esqueceu engadir a este panel un pequeno refraneiro popular relacionado co tempo xa que "son unha das primeiras estadísticas de coñecemento de datos climáticos", en palabras do autor.
(Pódese descargar o panel en resolución para imprimir no PDF que se atopa no fondo desta nova).
Descargar arquivoMiguel A. García Pérez, Premio Nacional de Meteoroloxía
O noso compañeiro e secretario do C. E. Chamoso Lamas, Miguel García, acaba de ser galardoado co Premio Nacional de Meteoroloxía, un merecido premio que vén facer xustiza ó seu traballo diario e desinteresado durante décadas. O acto de entrega terá lugar en Madid o día 23 de marzo deste ano.
Despois de máis de 35 anos dedicado ó mundo da investigación sobre o clima na nosa comarca e xa apartado do mundo das aulas, Miguel centra agora os seus traballos na difusión e estudo de tan inxente cantidade de datos acumulados ó longo destas décadas que, cada dous anos, temos a sorte de compartir nos nosos congresos do Home e o Medio ou en publicacións especializadas, como o aparecido máis recentemente no Anuario da AEMET en coautoría co noso compañeiro Diego Reboredo.
Presentación do catálogo e clausura da exposición "22 anos ollando estas terras"
O sábado, día 20 de xaneiro, ás 20 horas terá lugar na Sala de Exposicións do Auditorio Manuel María do Carballiño, a presentación do catálogo da Exposición "20 anos ollando estas terras", publicación que recolle a totalidade das obras presentadas na edición anterior. Ó longo de case 100 páxinas, a publicación editada en cor e coas características de edición que require unha obra deste tipo, recolle de xeito individualizado cada unha das obras que no seu día estiveron expostas ó público durante máis dun mes. Ademais deste repertorio fotográfico elaborado polo membro do Centro de Estudios Chamoso Lamas, Juanjo Álvarez, o catálogo conta cun limiar a cargo do Presidente do colectivo e cuns valiosos textos críticos aportados polos dous comisarios da exposición, Juan Manuel Rodríguez e Óscar Gónfer.
Rematado ese acto realizarase a clausura desta exitosa segunda edición pola que pasaron centos de veciños que puideron contemplar a valía e a potencidalide dos nosos artistas que, coas súas obras, deron a coñecer o enorme talento que atesouran.
Torques de Honra 2017
Podedes ler o discurso lido polo noso compañeiro Óscar Gonfer co gallo da entrega do Torques de Honra 2017 a Manuel Gallego Jorreto no arquivo adxunto.
Exposición de Arte
Como xa aconteceu no ano 2015, o Centro de Estudios Chamoso Lamas organiza coa inestimable colaboración de numerosos artistas destas terras do interior de Galicia unha Exposición que baixo o título de "22 anos ollando estas terras. Xentes, espazos e lugares" pretende ser "unha xanela pola que ollar as terras, as xentes e a culura das comarcas do CArballliño e do Ribeiro", tal e como a define o comisario da mesma, Óscar Gónfer. A citada mostra reúne máis de medio cento de obras pictóricas e escultóricas de autores xa consagrados no panorama cultural galego e outros noveis que teñen unha oportunidade de darse a coñecer diante da sociedade e da crítica.
A inauguración terá lugar o domingo, día 17 de decembro, ás 20,30 horas na Sala de Exposicións do Auditorio Manuel María do Carballiño, sendo un acto aberto e público ó que convidamos a toda a sociedade carballiñesa e do Ribeiro.
Os horarios de visita serán:
De martes a venres: de 18 a 21 horas
Sábados, domingos e festivos (agás Nadal e Aninovo que non se abre): de 11 a 13 horas.
A duración da mesma está prevista dende ese día 17 de decembro ata o día 15 de xaneiro de 2018. Coincidindo con ese acto de peche, presentarase o Catálogo da edición correspondente ó ano 2015.
O Galardón Torques de Honra, para o arquitecto carballiñés Manuel Gallego Jorreto
O Centro de Estudios Chamoso Lamas acordou conceder ao arquitecto Manuel Gallego Jorreto o “Torques de Honra 2017”. Trátase dun galardón que realiza con carácter bianual este colectivo para distinguir o traballo de persoas e entidades a prol da conservación, recuperación e divulgación do patrimonio histórico-cultural. Nesta quinta edición do premio, os integrantes do Centro de Estudios Chamoso Lamas tomaron en consideración o importante labor desenvolvido por Manuel Gallego Jorreto no proxecto de rehabilitación da antiga fábrica de papel da Lavandeira, así como do que realiza na actualidade para ampliar as instalacións termais do Gran Balneario do Carballiño e a súa ampla traxectoria nesta actividade recuperadora do noso Patrimonio.
O galardón será entregado nun acto que se desenvolverá no Carballiño o próximo mes de decembro, e que se anunciará previamente.
Manuel Galllego Jorreto, nado no Carballiño en 1936, ten recibido numerosos premios, entre eles, o Premio Nacional de Arquitectura (1997), Medalla de Ouro da Arquitectura (2010) e Medalla de Ouro de Galicia (2016). Colaborou co Centro de Estudios Chamoso Lamas, sendo ponente no I Congreso “O Home e o Medio”, e varios historiadores desta entidade conlaboraron co él na aportación da documentación histórica da antiga fábrica de papel da Lavandeira. Na actualidade ultima o proxecto de ampliación das instalación termais do Gran Balneario.
Presentación do libro Pico Sacro ferido polo lóstrego e a lenda.
O vindeiro día 1 de decembro, venres, ás 20 horas terá lugar a presentación no Carballiño do libro Pico Sacro ferido polo lóstrego e a lenda. O acto no que colabora o Centro de Estudios Chamoso Lamas en colaboración coa AA CC Mestre Manuel García e maila editorial Alvarellos, terá lugar na Casa da Cultura.
A obra é un amplo repertorio de textos literarios, algúns deles inéditos e outros de autores consagrados do mundo literario galego, que fan alusión a este mítico monte que se ergue maxestoso sobre o curso do Ulla e vixiante da veciña Compostela.
Coma sempre, a entrada é libre.