Novas

Novas

Filtro
Info
20 Agosto 2018

XI Congreso do Centro de Estudios Chamoso Lamas

Os días 28, 29 e 30 de setembro, o C. E. Chamoso Lamas vai celebrar o seu XI Congreso co suxestivo título de "Mesturas ás beiras do Miño. O fluxo cultural entre Galicia e Portugal". Unha vez máis, o lugar elixido para a súa execución vai ser a nosa sede da Casa da Vexanca, en Belvís-Cabanelas e, como novidade, a segunda xornada celebrarase en terras portuguesas. En días vindeiros teredes información completa do Programa de actividades e doutros pormenores, tales como prazo de matrícula, prezos, etc.

Se estades interesados en presentar algunha comunicación ó Congreso podedes facelo durante a semana do 20 ó 26 de agosto por medio do mail de contacto do C. E. Chamoso Lamas ou ós teléfonos 629879491 e 610782630.

Info
23 Marzo 2018

Miguel A. García recolle o seu galardón en Madrid.

Hoxe, día 23 de marzo, cadrando co Día Mundial do Medio Ambiente, o noso compañeiro Miguel A. García Pérez, responsable da estación meteorolóxica do IES Chamoso Lamas e da sección de Climatoloxía do Centro de Estudios, recolleu na sede central da Axencia Estatal de Meteoroloxía (AEMET) en Madrid o galardón co que foi recoñecido o seu traballo ó longo de máis de 34 anos á fronte da citada estación.

O acto contou coa presenza da Secretaria de Estado de Medio Ambiente, María García Rodríguez e do Presidente da Axencia Estatal de Meteoroloxía, Miguel Ángel López, recoñecendo os dous o labor "desinteresada y comprometida" do noso compañeiro. A secretaria de Estado agradeceu o seu traballo "y el de muchos otros, que destaca por su calidad y precisión, ha sido y es esencial para completar la observación de las instalaciones operadas por personal propio".

O remate do acto serviu, tamén, para presentar un diccionario ilustrado de meteoroloxía, climatoloxía e ciencias afíns con case 700 termos e máis de 1.200 imaxes, que pódese consultar en https://meteoglosario.aemet.es/.

Descargar arquivo
Info
24 Febreiro 2018

Presentación do Panel Climático do Carballiño

O Salón de Plenos do Concello do Carballiño serviu de escenario para a presentación do Panel Climático do Carballiño, un traballo de 34 anos de investigación diaria do noso compañeiro Miguel A. García e condensados nun só panel no que tamén colaborou o noso compañeiro Diego Reboredo Prado. A amplísima información que aporta non logra desvelar ningunha novidade salientable sobre o noso clima, en palabras do propio investigador, que engadía que cómpren moitos máis anos para poder aportar conclusións máis exactas sobre o proceso evolutivo do clima. O acto contou coa presenza do Alcalde, Francisco Fumega, que fixo a presentación á prensa no nome do Concello e do Presidente do C. E. Chamoso Lamas.

 O panel conta con información de temperaturas medias, máximas e mínimas; datos anuais de precipitacións; información sobre as xeadas e as condicións da seca ambiental que se producen entre os meses de abril e setembro. A esta información hai que engadir unha táboa que recolle os parámetros climáticos xerais do Carballiño e outra máis que amosa as curiosidades más extremas. Para rematar, o autor falou de que aínda faltan por incorporar dúas variantes moi importantes, como son a humidade e a irradiación solar. Tampouco se esqueceu engadir a este panel un pequeno refraneiro popular relacionado co tempo xa que "son unha das primeiras estadísticas de coñecemento de datos climáticos", en palabras do autor.

(Pódese descargar o panel en resolución para imprimir no PDF que se atopa no fondo desta nova).

Descargar arquivo
Info
25 Xaneiro 2018

Miguel A. García Pérez, Premio Nacional de Meteoroloxía

O noso compañeiro e secretario do C. E. Chamoso Lamas, Miguel García, acaba de ser galardoado co Premio Nacional de Meteoroloxía, un merecido premio que vén facer xustiza ó seu traballo diario e desinteresado durante décadas. O acto de entrega terá lugar en Madid o día 23 de marzo deste ano. 

Despois de máis de 35 anos dedicado ó mundo da investigación sobre o clima na nosa comarca e xa apartado do mundo das aulas, Miguel centra agora os seus traballos na difusión e estudo de tan inxente cantidade de datos acumulados ó longo destas décadas que, cada dous anos, temos a sorte de compartir nos nosos congresos do Home e o Medio ou en publicacións especializadas, como o aparecido máis recentemente no Anuario da AEMET en coautoría co noso compañeiro Diego Reboredo. 

Info
14 Decembro 2017

Exposición de Arte

Como xa aconteceu no ano 2015, o Centro de Estudios Chamoso Lamas organiza coa inestimable colaboración de numerosos artistas destas terras do interior de Galicia unha Exposición que baixo o título de "22 anos ollando estas terras. Xentes, espazos e lugares" pretende ser "unha xanela pola que ollar as terras, as xentes e a culura das comarcas do CArballliño e do Ribeiro", tal e como a define o comisario da mesma, Óscar Gónfer. A citada mostra reúne máis de medio cento de obras pictóricas e escultóricas de autores xa consagrados no panorama cultural galego e outros noveis que teñen unha oportunidade de darse a coñecer diante da sociedade e da crítica. 

A inauguración terá lugar o domingo, día 17 de decembro, ás 20,30 horas na Sala de Exposicións do Auditorio Manuel María do Carballiño, sendo un acto aberto e público ó que convidamos a toda a sociedade carballiñesa e do Ribeiro.

Os horarios de visita serán:

De martes a venres: de 18 a 21 horas

Sábados, domingos e festivos (agás Nadal e Aninovo que non se abre): de 11 a 13 horas.

A duración da mesma está prevista dende ese día 17 de decembro ata o día 15 de xaneiro de 2018. Coincidindo con ese acto de peche, presentarase o Catálogo da edición correspondente ó ano 2015.

Info
29 Novembro 2017

O Galardón Torques de Honra, para o arquitecto carballiñés Manuel Gallego Jorreto

O Centro de Estudios Chamoso Lamas acordou conceder ao arquitecto Manuel Gallego Jorreto o “Torques de Honra 2017”. Trátase dun galardón que realiza con carácter bianual este colectivo para distinguir o traballo de persoas e entidades a prol da conservación, recuperación e divulgación do patrimonio histórico-cultural.  Nesta quinta edición do premio, os integrantes do Centro de Estudios Chamoso Lamas tomaron en consideración o importante labor desenvolvido por Manuel Gallego Jorreto no proxecto de rehabilitación da antiga fábrica de papel da Lavandeira, así como do que realiza na actualidade para ampliar as instalacións termais do Gran Balneario do Carballiño e a súa ampla traxectoria nesta actividade recuperadora do noso Patrimonio.

O galardón será entregado nun acto que se desenvolverá no Carballiño o próximo mes de decembro, e que se anunciará previamente.

Manuel Galllego Jorreto, nado no Carballiño en 1936, ten recibido numerosos premios, entre eles, o Premio Nacional de Arquitectura (1997), Medalla de Ouro da Arquitectura (2010) e Medalla de Ouro de Galicia (2016). Colaborou co Centro de Estudios Chamoso Lamas, sendo ponente no I Congreso “O Home e o Medio”, e varios historiadores desta entidade conlaboraron co él na aportación da documentación histórica da antiga fábrica de papel da Lavandeira. Na actualidade ultima o proxecto de ampliación das instalación termais do Gran Balneario.

Info
18 Novembro 2017

Presentación do libro Pico Sacro ferido polo lóstrego e a lenda.

O vindeiro día 1 de decembro, venres, ás 20 horas terá lugar a presentación no Carballiño do libro Pico Sacro ferido polo lóstrego e a lenda. O acto no que colabora o Centro de Estudios Chamoso Lamas en colaboración coa AA CC Mestre Manuel García e maila editorial Alvarellos, terá lugar na Casa da Cultura.

A obra é un amplo repertorio de textos literarios, algúns deles inéditos e outros de autores consagrados do mundo literario galego, que fan alusión a este mítico monte que se ergue maxestoso sobre o curso do Ulla e vixiante da veciña Compostela.

Coma sempre, a entrada é libre.

 

Info
6 Novembro 2017

Á venda o libro Cemiterios esquecidos do compañeiro Jorge Lamas

Dende hai uns días xa se atopa á venda o libro Cemiterios esquecidos, obra do noso compañeiro e responsable de sección de Arqueoloxía do Centro de estudios Chamoso Lamas, Jorge Lamas, que foi editado pola Deputación de Ourense. Ó longo de 365 páxinas, o autor fai unha minuciosa andaina pola cultura tumularia da comarca do Arenteiro, dando a coñecer aspectos ata agora agochados sobre estes elementos do noso legado patrimonial -inéditos na súa meirande parte- que se amosan perfectamente definidos nunhas detalladas fichas de cada un deles e nun rigoroso estudo global final que dá a ver e comprender as chaves deste interesante mundo que arrinca dende o Neolítico e que terá un importante desenvolvemento nesta área do NO da actual provincia de Ourense. Con esta obra o megalitismo da área estudada queda definitivamente encadrado nos traballos de investigación realizados en Galicia sobre esta temática e que, ata agora, estaban no anonimato. Parabéns ó noso compañeiro e ó mundo da investigación arqueolóxica.

Descargar arquivo
Info
27 Xullo 2017

Andaina ós Petroglifos de Cangues

Seguindo cos roteiros guiados levados adiante neste ano no que andamos, o Centro de Estudios Chamoso Lamas organiza en colaboración co concello do Carballiño e dentro da programación cultural da Festa do Pulpo, unha andaina nocturna ós petroglifos de Cangues, en Madarnás. Estará guiada polos compañeiros Jorge Lamas, Adolfo Otero e Juanjo Álvarez e partirá do local social de Madarnás ás 22,00 h., estando previsto o encontro para as 21,30 h., deste venres 28 de xullo no campo da festa (detrás da igrexa parroquial). Neste roteiro poderanse ver coa luz da lúa e a artificial perspectivas imposibles de divisar coa do día. Tamén tratarase de valorar os sons e a escuridade da noite .

Para participar non é preciso realizar ningunha inscrición previa, pero recoméndase acudir con lanterna, calzado cómodo e roupa de abrigo e, os que poidan, algún material reflectante (Chaleco, manguitos, etc.). O percorrido de ida e volta é duns 6 kilómetros, aproximadamente.

Info
20 Xuño 2017

Rosa Ricoy, Premio á innovación docente da Asociación Española de Ciencia Política

A nosa compañeira do Centro de Estudios Chamoso Lamas, Rosa Mª Ricoy Casas, vén de ser galardoada co Premio á innovación docente da Asociación Española de Ciencia Política como recoñecemento ó seu traballo nun proxecto educativo no que mestura o ameno co científico como xeito de atraer o interés do alumnado e mergullalo no proceso formativo dun xeito distinto pero sen perder o carácter reflexivo e educacional do sistema docente universitario. Rosa Ricoy foi durante catro anos Presidenta do C.E. Chamoso Lamas e, actualmente, ocupa o posto de profesora da Facultade de Ciencias Sociais e da Comunicación e coordinadora do grao en Dirección e Xestión Pública da Universidade de Vigo. Os nosos parabéns.

Páxinas