Novas

Novas

Filtro
Info
3 Agosto 2020

Suspendido o Congreso do Centro de Estudios Chamoso Lamas

A Xunta directiva do C. E. Chamoso Lamas acordou suspender a celebración do seu congreso bienal unha vez analizada a situación xerada pola pandemia provocada pola COVID19 e pola evolución da mesma dentro deste espazo territorial.

De tódolos xeitos, estase a traballar para poder ofertar algunhas alternativas que permitan o desenvolvemento dunha certa actividade cultural, adaptadas á normativa vixente e, sobre todo, á seguridade sanitaria, primordial neste momento.

Info
21 Febreiro 2020

Inauguración da Exposición de Arte AR(T)ENTEIRO

O sábado, 22 de febreiro, ás 20,30 horas terá lugar a inauguración da 3ª edición desta bienal de arte que organiza o Centro de Estudios Chamoso Lamas. O acto terá lugar na Sala de Exposicións do "Auditorio Manuel María do Carballiño". Nesta Edición, a mostra conta coa presenza dun total de 41 artistas que aportan o seu talento nun total de 49 obras para a celebración deste evento que xa forma parte habitual das actividades do noso colectivo.

A exposición permanecerá aberta ó público ata o día 21 de marzo e poderá ser visitada no seguinte horario:

-De martes a venres, de 18 a 21 horas

-Sábado, domingo e festivos, de 12 a 14 horas.

-Luns, pechada.

O C. E, Chamoso Lamas, agradece a colaboración do Concello do Carballiño para o desenvolvemento desta actividade.

Info
12 Decembro 2019

O Torques de Honra 2019 para os Arquivos Catedralicio e Diocesano de Ourense

O C. E. Chamoso Lamas acurdou conceder o seu galardón Torques de Honra na edición deste ano 2019 ós Arquivos Catedralicio e Diocesano de Ourense pola súa contribución á preservación e difusión do patrimonio documental da diócese ourensana, labor que se vén realizando sistematicamente nas últimas décadas dun xeito contínuo malia á escaseza de recursos. Neste aspecto, subliñar o papel xogado polos distintos directores na catalogación e no constante labor de captación de fondos que teñen servido para o estudo e elaboración de numerosos traballos realizados ó longo dos longos anos de vida destas institucións.

O Centro de Estudios Chamoso Lamas quere recoñecer e agradecer a colaboración prestada polo persoal destes dous arquivos cos investigadores que acuden a diario ás súas instalacións, facendo unha mención especial na figura de D. Miguel Ángel González García, director dos mesmos e gran valedor de iniciativas como é a publicación Diversarum Rerum e a súa implicación persoal en numerosas actividades culturais de fomento da investigación (congresos, conferencias, publicacións, etc.).

O acto de entrega terá lugar o próximo 21 de decembro, ás 20,30 horas, no Restaurante A Fuchela do Carballiño. 

Info
21 Novembro 2019

Presentación do libro Encontros do Saber editado polo Centro de Estudios

O venres, día 22 de novembro, ás 8,30 da tarde, teremos a presentación do libro que leva por título Encontros do Saber, unha obra que, ó longo de 450 páxinas elaboradas por especialistas, fai nuha análise pormenorizada de diversos temas que teñen que ver coa educación, a antropoloxía, a ciencia, a historia, a arqueoloxía e outras disciplinas do saber que veñen encher un baleiro, nuns casos, sobre as temáticas abordadas e, noutros, complementar ou aportar novidades sobre as materias citadas.

O acto celebrarase no Aparthotel Arenteiro, sendo de libre asistencia para calquera persoa interesada na materia. 

Info
20 Setembro 2019

Suspendida a andaina do día 21

Por previsión de fortes choivas para o sábado, día 21, queda SUSPENDIDA a andaina programada para ese día, polo que farémola o próximo día 28, mantendo tanto o itinerario como o horario marcado. Calquera dúbida ou suxestión será ben recibida.

Info
12 Setembro 2019

Andaina Ponte Veiga-Cabanelas para o día 21 de setembro

Un roteiro guiado con saída dende a Ponte de Veiga ata á sede do Centro de Estudios Chamoso Lamas, en Cabanelas, porá o colofón aos actos programados por esta entidade para conmemorar o 25 aniversario da súa creación.

Trátase dun percorrido duns 10 km por algúns dos lugares de maior interese histórico e paisaxístico do municipio carballiñés e de Boborás, e que inclúe unha parada en Moldes a mediodía para xantar, así como a proxección ao remate dun video sobre os 25 anos de traxectoria do centro de estudios, que se fará na sede da entidade en Cabanelas. Algúns destes lugares son: Ponte de Veiga, Gran Balneario, Museo Etnográfico, Torre de Godás, Ponterriza, Moldes, Castro Cavadoso, Cima de Vila e Cabanelas, seguindo o curso do río Arenteiro e polas inmediacións. A andaina estará guiada polos arqueólogos, historiadores e biólogos do centro de estudios, que irán dando explicacións de cada un dos monumentos e lugares de maiori nterese. A saída da ruta está prevista para as 9.30 h., e o regreso ás 18,00 h.

Para poder participar nesta andaina, que ten as prazas limitadas a 50 en total, hai que inscribirse previamente na dirección de correo electrónico do centro de estudios contacto@centrodeestudioschamoslamas.com  ou chamando aos teléfonos 629 879 491 (Xosé Luis) ou 610 782 630 (Miguel).

O prezo da inscrición é de 5 euros, e inclúe o xantar en Moldes e o regreso desde Cabanelas en vehículo. O prazo de inscrición remata o xoves 19 de setembro.

Dificultade: media

Roupa e calzado axeitado.

Info
9 Setembro 2019

Mesa redonda: 25 anos na vida do Carballiño (1994-2019)

Con boa asistencia de púlico a este acto programado co gallo dos 25 anos do Centro de Estudios, celebrouse o sábado, día 7 de setembro, na Casa da Cultura do Carballiño unha interesante mesa redonda conformada por Manuel Amil, Xan MIras Portugal, Francisco Fumega e José Antonio Barge na que, previa exposición inicial de cada un dos ponentes centrada na actividade política, social, cultural, demográfica e educativa moderada polo noso compañeiro e xornalista Carlos Rodríguez, serviu para lembrar momentos importantes deste cuarto de século dende a perspectiva de tan significativos persoeiros coñecedores da vida do Carballiño e a súa comarca. O resultado foi un interesante debate, facendo un interesante exercicio de reflexión e lembranza sobre a memoria colectiva destes 25 anos. 

Dende o Centro de Estudios Chamoso Lamas, o noso agradecemento ós asistentes e, de xeito especial, ós nosos convidados.

Fotogalería

Info
27 Xullo 2019

De vagar: un paseo polas rúas do centro do Carballiño.

O domingo, día 28 de xullo, ás 11 horas saíremos diante do Asilo do Carballiño para facer un percorrido por algunhas das rúas do Carballiño. Esta ruta é un dos actos programados para conmemorar o noso 25 Aniversario e ten unha duración aproximada de 2 horas nas que trataremos de coñecer mellor a trama urbana desenvolvida ó longo dos séculos XVIII e XIX e que conformaron a actual configuración da nosa vila, deténdonos nalgúns dos edificios máis sobranceiros e lembrando os vellos nomes das rúas e prazas, así como algúns dos ilustres habitantes que ocuparon no seu día esas vivendas.A asistencia é libre e de balde.

Info
17 Maio 2019

XXV Aniversario do Centro de Estudios Chamoso Lamas

Hoxe, 17 de maio, estamos de aniversario. Xa van 25 anos dende a nosa fundación como colectivo, anos nos que, entendemos, levamos aportado un importante labor de investigación, difusión e compromiso coa nosa cultura, todo elo reflectido nas nosas publicacións, exposicións, congresos, andainas e outro tipo de eventos feitos por un colectivo de xentes de aquí e para aquí. Quedan atrás, pois, dende aquela primeira xuntanza formal realizada na vella  "Casa Gazpara", moito esforzo colectivo, algún que outro erro pero moitos acertos do grupo e individuais recoñecidos con importantes premios que veñen a avalar o noso traballo ó longo deste cuarto de centuria: Premios Ínsua dos Poetas e Pedra do destin e, a título individual, o Premio Nacional de Meteoroloxía a Miguel García, Premio Antón Losada a Xosé Fernández e o Premio AECPA ó mellor proxecto á Innovación Docente concedido a Rosa Mª Ricoy. Atrás tamén quedan algúns compañeiros de viaxe como os inesquecibles frei Damián Yáñez, Socio de Honra, e o doutor Luis Rodríguez Míguez, membro deste grupo dende o seu inicio e que tanto saber, cariño e amizade deixaron no noso recordo.

Pero son os traballos colectivos onde as achegas realizadas destacan pola variedade e, sobre todo, polo interese que espertan: as 11 edicións do noso Congreso, as Bienais de Arte, conferencias e xornadas xunto coas exposicións e andainas guiadas, teñen achegado á sociedade comarcal aspectos novidosos e impensables nesta vila. A nosa Revista Argentarium con 14 números (revista e anexos) é o maior e mellor expoñente da nosa andaina ó longo destes anos, recollendo nas súas páxinas os traballos de investigación de moitas persoas que, día a día, dedican o seu esforzo e tempo en facer máis grande esta Terra.

O noso agradecemento á sociedade comarcal, ós nosos veciños de Cabanelas e a aquelas persoas, empresas e entidades que levan moitos anos colabroando activamente connosco para levar adiante os nosos proxectos, pero dun xeito especial o noso recoñecemento a Felipe Senén López e a Aurelio Miras a quen debemos eterna gratitude.

 

Info
6 Maio 2019

Presentación do libro "Cemiterios esquecidos: o fenómeno tumular na comarca do Carballiño".

Como xa adiantamos, o Centro de Estiudios Chamoso Lamas celebra este ano 2019 o seu 25 aniversario. Con tal motivo está a deseñar un programa de actividades que ainda non ten datas concretas, pero que podería levarse a cabo entre o 15 de agosto e o 15 de setembro.

En todo caso, o 17 de maio próximo, Día das Letras Galegas, e data na que se cumple este vixésimoquinto aniversario, terá lugar a presentación do libro do arqueólogo e coordinador da sección de Arqueoloxía da entidade, Jorge Lamas Bértolo, titulado “Cemiterios esquecidos: O fenómeno tumular na comarca do Arenteiro", nun acto público ó que está convidada toda a sociedade da comarca e que desenvolverase no Aalón de Actos do Casino do Carballiño, na rúa Tomás Mª Mosquera ás 19,30 h.

Páxinas